اسلام آباد۔7جولائی (اے پی پی):وزیراعظم عمران خان نیشنل کمانڈ اینڈآپریشن سنٹر (این سی اوسی) دے اراکین ، احساس دی ٹیم اتے سٹیٹ بینک آف پاکستان کوں کووڈ۔19 دی وبا دے خلاف موثر حکمت عملی مرتب کرݨ تے مبارخ ݙتی ۔ بدھ کوں آپݨے ٹویٹ اچ انہاں این سی او سی دے ارکان، احساس پروگرام دی ٹیم اتے سٹیٹ بینک آف پاکستان دی موثر حکمت عملی تے مبارخ ݙیوݨ دے نال نال اللہ تعالیٰ دی خصوصی رحمت تے رب دا شکر ادا کیتے ۔ وزیراعظم اپݨے ٹویٹ اچ معروف عالمی جریدے اکانومسٹ دی “گلوبل نارمیلسی انڈیکس ” وی شیئر کیتے جیں اچ کورونا وائرس دی وبا دے بعد بحالی دے حوالے نال پوری دنیا دے مختلف ملکاں دی کارکردگی دی درجہ بندی کیتی ڳئی ۔ اکانومسٹ کووڈ۔19 دی وبا دے حوالے نال موثر حکمت عملی مرتب کرݨ تے پاکستان کوں بہترین کارکردگی دامظاہرہ کرݨ آلے ملکاں دی فہرست اچ شامل کیتے ۔ اکانومسٹ جریدے وبا توں پہلے دی صورت حال تے واپسی دے حوالے نال پوری دنیا دے 50 ملکاں دی درجہ بندی کیتی اے اتے 84.4 سکور دے نال پاکستان تریجھا ملک اے جیں دی حکمت عملی موثر ترین رہی اے۔ پاکستان دا ہمسایہ ملک بھارت 46.5 سکور دے نال انتہائی چھیکڑی ملکاں اچ شامل اے اتے ایندی 48 ویں پوزیشن اے۔ اعدادو شمار موجب چین دا سکور 72.9 اتے ایندی 19 ویں پوزیشن اے جݙاں جو امریکا 72.8 سکور دے نال 20 ویں پوزیشن تے ہے۔ اکانومسٹ وبا توں پہلے دی صورت حال دی بحالی دے حوالے نال درجہ بندی کریندے ہوئیں کوروناوائرس دی وبا توں پہلے دی صورت حال تے واپسی دا اوسط سکور 66.6 مقرر کیتے ۔
.jpg)
